Nersornaat

Namminersornerullutik Oqartussat nersornaasiuttagaat 'Nersornaat'

Namminersornerullutik Oqartussat nersornaasiuttagaat Nersornaat 1989-imi Namminersornerullutik Oqartussat ukiut qulinngorlugit nalliuttorsiornerannut atatillugu pilersinneqarpoq.

Saqqarmiu tunniunneqartassaaq inunnut maani innuttaasunut taamatullu danskinut aamma nunani allamiunut - immikkut nersortariaqarluinnartumik Kalaallit Nunaannut sullissisimasunut, suliaat inuiaqatigiinnut sullissineruppat, inuussutissarsiornermut, eqqumiitsuliornermut, ilisimatuussutsimut imaluunniit allamut tunngasuuppat assigiimmik. Inatsisartut Siulittaasoqarfiat saqqummiuliinissamik aalajangiisartuuvoq. Nersornaat sølviusoq kuultiusorluunniit tunniunneqartarpoq.

Saqqarmiu sølviusoq saqqarmiulerneqartup nammineq pigisassaraa, piginnittoq inuutillugu allamut tunniuteqquneqartussaanngitsoq, qularnaveeqqusiuteqqusaanngitsoq imaluunniit eqqartuussisutigut sulissutigisitsissutaasussaanngitsoq. Saqqarmiu sølviusoq piginnittuata toqunerani pigisanut qimataanut ilanngunneqartussaavoq.

Saqqarmiu kuultiusoq Namminersornerullutik Oqartussat pigisaraat, saqqarmiullillu toqunerani piginnittumut utertinneqartussaatitaalluni. Nersornaat Namminersornerullutik Oqartussat sinnerlugit tunniussisumit nersornaasigaasumut namminermut tunniunneqartarpoq. Saqqarmiuliinermut peqatigitillugu allagartaq Inatsisartut Siulittaasuata atsiugaa tunniunneqartarpoq.

Nersornaatip tunniunneqarneranut atatillugu ilasseqatigiinnermut aningaasartuutit Inatsisartut Siulittaasoqarfiata akilertarpai.

Nersornaasiinissamik inassuteqaatit Siulittaasoqarfimmut nassiunneqartassapput, qarasaasiakkut inatsisartut@inatsisartut.gl.

Sidst redigeret af: Nils Baum (13 maj 2013 10:45)