Paasissutissat sukumiinerusut

Ilaasortat atuuffii aningaasatigullu soqutigisaat uani takukkit...

§ 1. Suleriaatsimut Ataatsimiititaliap kaammattuutigaa Inatsisartunut ilaasortat atuuffitik aningaasatigullu soqutigisatik malittarisassani ukunani aalajangersakkat malillugit nalunaarsortittassagaat.

 Imm. 2.Inatsisartunut ilaasortaagallartut malittarisassanut taakkununnga ilaatinneqarput ilaasortaaneq piffissami ataqatigiissummi sapaatit akunnerinit sisamanit sivisuneruppat.

 Imm. 3.Naalakkersuisunut ilaasortat Inatsisartunut ilaasortaanngitsut malittarisassani taakkunani aalajangersakkat malillugit nalunaarsortinneqarnissaminnut periarfissaqarput.

 Imm. 4.Ilaasortat atuuffimmik aningaasatigullu soqutigisamik nalunaarsortinneqarnissaannik toqqaasut malittarisassat tamakkiisumik akuersaassavaat.

 

§ 2. Atuuffiit aningaasatigullu soqutigisat makku nalunaarsorneqartassapput:

 

Isertitanut tunngasut

 

1)      Ingerlatseqatigiiffiinni namminersortuni pisortanilluunniit pigineqartuni siulersuisunut ilaasortaaffiit akissarsiaqaataasartut. Atorfik ingerlatseqatigiiffillu nalunaarsorneqassaaq.

2)      Inatsisartunut ilaasortaanerup saniatigut atorfiit, atuuffiit assigisaalluunniit akissarsiaqaataasartut. Atorfik sulisitsisoq suliassaqartitsisorluunniit nalunaarsorneqassapput.

3)      Inatsisartunut ilaasortaanerup saniatigut namminersortutut isertitaqarfiusumik ingerlataasartut. Ingerlatap suunera nalunaarsorneqassaaq.

 

Pigisanut tunngasunut isumaqatigiissutillu

 

4)      Atsiorluni akuersissuteqarneq sioqqullugu 31.12. ingerlatseqatigiiffinni soqutigisat erseqqissumik kr. 50.000-it sinnerlugit nalillit kiisalu 31.12 kingorna ingerlatseqatigiiffinni soqutigisat nutaat erseqqissumillu kr. 50.000-it sinnerlugit nalillit. Ingerlatseqatigiiffiup aqqa nalunaarsorneqassaaq.

5)      Siusinnerusukkut sulisitsisorisimasamik isumaqatigiissutit aningaasartallit, tassunga ilanngullugit Inatsisartunut ilaasortaanerup nalaani sulinngiffeqarnissamik, akissarsiaqarani sulinngikkallarnissamik, akissarsisinneqaannartarnissamik imaluuniit sulisutut ajunngitsorsiassat, soraarnerussutisiaqarnissamut pisinnaatitaaffiit assigisaasalu attatiinnarneqarnissaannut isumaqatigiissutit.

 

§ 3. Nalunaarsuineq pissaaq Inatsisartut nutaat katersuunnerat, sinniisussap nalinginnaasumik ilaasortatut akuerineqarnerata imaluunniit ilaasortaagallartumut nalunaarsuisuussaatitaanerup atuutilernera qaammammik ataatsimik qaangertinnagu. Taamaattorli paasissutissat nalunaarsorneqartussaatitaasut nutaat, tassunga ilanngullugit ingerlatseqatigiiffinni soqutigisat nutaamik pissarsiat pillugit paasissutissat, imaluunniit paasissutissanik siusinnerusukkut nalunaarsorneqarsimasunik allanngortitsinerit, tassunga ilanngullugit ingerlatseqatigiiffinni soqutisat pissarsiarineqarnermik kingorna aatsaat erseqqissumik kr. 50.000-it sinnerlugit naleqalersimasut, aatsaat piffissaq eqqorlugu nalunaarsorneqarsinnaapput § 4 malillugu atsiorluni akuersissuteqartoqareerpat.

 Imm. 2.Nalunaarsuineq pissaaq Inatsisartut Allattoqarfianni atorfilimmut Inatsisartut Siulittaasoqarfiannit toqqarneqarsimasumut. Immersuivissat nalunaarsuinermi atorneqartussat Inatsisartut Siulittaasoqarfiannit akuerineqarsimassapput.

 Imm. 3.Imm. 1 malillugu nalunaarsuisussaatitaanerup atuutilerneraniit ullut nalinginnaasut 20-it (arfininngornerit ilanngunnagit) qaangiutsinnagit nalunaarsuivik kikkunnit tamanit takuneqarsinnaassaaq atorfilimmut nalunaarsuinermik isumaginnittumut saaffiginnissuteqarluni. Inatsisartut Siulittaasoqarfiata aalajangersinnaavaa nalunaarsuiffimmi paasissutissat aamma Inatsisartut nittartagaatigut kikkunut tamanit takuneqarsinnaassasut.

 

§ 4. Nalunaarsorneqarnissamut piumasaqaataavoq § 3-mi taaneqartutut tamanut saqqummiussisoqarsinnaaneranik Inatsisartunut ilaasortap atsiorluni akuersisimanissaa. Akuersissut ukiut tamaasa nutarterneqartassaaq.

 

§ 5. Malitttarisassat 1. juli 2011 atuutilerput.