Apeqquteqaat aallaavigalugu oqallisissiaq 

Apeqquteqaat aallaavigalugu oqallinnissamik siunnersuutit -

Eqqaamasassat nalunaarsorsimaffiat1. Tunniussivissatut killiliunneqartoq.

Apeqquteqaat aallaavigalugu oqallinnissamik siunnersuutit Inatsisartut ataatsimiinnissaata aallartinnissaa sapaatit akunnerinik tallimanik sioqqullugu tunniunneqarsimassapput.

2. Ilusiliinissamut piumasaqaatit eqquutsinneqarsimanissaat.

Allannissaanut najoqqutassiaq atoruk ataatsimiititaliallu allattaanik ikiorteqarsinnaaneq atorluaruk. Ilusiliinissamut piumasaqaatit eqquutsinneqarsimanngippata ullormut oqaluuserisassanut siunnersuutip Inatsisartunit oqaluuserineqarneranut atatillugu siunnersuut itigartitsissutigineqartussatut Inatsisartut Siulittaasoqarfiannit inassutigineqassaaq.

3. Oqallisigitikkumasat maannakkorpiaq pisunut attuumassuteqarnersoq inuiaqatigiillu eqqarsaatigalugit pingaaruteqarnersoq isumaliutersuutigiuk.

Oqallisigitikkumasaq maannakkorpiaq pisunut annertunerpaamik attuumassuteqarpat inuiaqatigiinnullu siamasissumik pingaaruteqarpat Inatsisartut ataatsimiinnerminni oqaluuserisassaannut ilanngunneqarnissaa ilimanarnerussaaq. Siunnersuutit najukkami pissutsinut taamaallaat tunngasut aallavittut isigalugu Inatsisartut Siulittaasoqarfiannit itigartitsissutigineqarnissaat naatsorsuutigineqartariaqarpoq. Aamma taamaappoq siunnersuutit "imakippallaat" pillugit. Assersuutigalugu appat ikiliartornerannit timmissat imarmiut nungutaanissaminnut ulorianartorsiortut qanoq pitsaanerpaamik ikiliartorunnaarsinneqarsinnaanerat apeqquteqaat aallaavigalugu oqallissisiatut siunnersuutigissallugu pitsaanerussaaq.

Pissutsit apeqquteqaat aallaavigalugu oqallinnissamut naammattumik tunngaviliisuun-ngitsut sammineqarnissaat kissaatigigukku taarsiullugu Naalakkersuisunut allakkatigut apeqquteqarnikkut pissutsit pineqartut soqutigineqalersissinnaavatit. Apeqqutip taamatullu Naalakkersuisut akissuteqaataasa nuutinneri Inatsisartuni ilaasortaqatinnut agguaanneqassapput. Tusagassiorfinnut nalunaaruteqarnikkut tusagassiorfiit soqutiginnilersissinnaavatit.

4. Sammineqartoq Inatsisartunit siusinnerusukkut oqallisigineqarsimanersoq misissoruk. Sammisat ukiuni kingullerni Inatsisartuni oqallisigineqarsimasut ullormut oqaluuserisassatut ilannguteqqinneqarsinnaanerat aallaavittut isigalugu naatsorsuutigineqarsinnaanngilaq. Pisariaqartikkukku ataatsimiititaliami allatsi aperisinnaavat.

5. Apeqquteqat aallaavigalugu oqallinnissamik siunnersuutip suliarineqarneranut atatillugu ataatsimiititaliami allatsimik ikiorteqartarit, eqqaamalluguli ulloq tunniussereerfissaq sioqqulluarlugu ataatsimiititaliami allatsimut saaffiginnittariaqaravit (Inatsisartut ataatsimiinnissaata aallartinnissaa minnerpaamik sapaatit akunnerinik arfineq marlunnik sioqqullugu, ajornanngippalli siusinnerujussuakkut).

6. Eqqaamajuk siunnersuutit Inatsisartut Allattoqarfiannut USB-kkut imaluunniit email -imut ilanngullugu nassiutissagakku.

Allatanut nassuiaatit

1. Ulluliunneqartoq tassaavoq ulloq siunnersuutip Inatsisartut Allattoqarfiannut nassiunneqarnerata ullua.

2. Siunnersuummut ullormut oqaluuserisassani normuliunneqartoq ilanngullugu Inatsisartut Allattoqarfiannit immersorneqassaaq. UPA tassaavoq upernaakkut ataatsimiinneq, UKA-li tassaalluni ukiakkut ataatsimiinneq.

3. Apeqquteqaat aallaavigalugu oqallinnissamik siunnersuutip qulequtaa ima aallartinneqassaaq "...pillugu apeqquteqaat allaavigalugu oqallinnissamik siunnersuut" apeqquteqaallu aallaavigalugu oqallisigineqartussatut siunnersuutigisami sammineqartup naatsumik ersarissumillu nalunaarneqarneranik malitseqartinneqassalluni. Qulequtaa ersarissunngorlugu allanneqassaaq.

4. Siunnersuuteqartup taaguutaa, aqqa partii ilaasortaavia apeqqutip sammineqartup qulequtaata atsinnguani ungaluusap iluani nalunaarneqassapput. Partii ilaasortaaffittut nalunaarneqartoq tassaasinnaavoq "Siumut", "Inuit Ataqatigiit", "Atassut", "Demokraatit", "Kattusseqatigiit Partiiat" imaluunniit "attaviitsoq".

5. Itisilerutaasumik nassuiaat immikkut qulequtsernagu aallartinneqassaaq. Itisilerutaamik nassuiaatip apeqqutinut aalajangersimasunut Naalakkersuisut oqaaseqaateqarnissaannik kaammattuut imarigajuppaa (Taamaattumillu "apeqquteqaat aallaavigalugu oqallinnermik" taaguuteqarpoq).

6. Inatsisartut Allattoqarfiannit immersorneqassaaq.

7. Inatsisartut Allattoqarfiannit immersorneqassaaq.

 Apeqquteqaat aallaavigalugu oqallinnissamik siunnersuutip aallartissutigisinnaasaatut assersuut: