Ataatsimiititaliat
Inatsisartut ataatsimiititalianik arlalinnik pilersitsisarput.
Ataatsimiititaliat arfineq marluk tikillugit ilaasortaqarsinnaapput
Naalakkersuisunut ilaasortaaqqusaanngitsunik.
Inatsisartut
Siulittaasoqarfiata saniatigut ataatsimiititaliat tallimat
inatsisit naapertorlugit pilersinneqartussaatitaapput - tassa
pinngitsooratik pilersinneqartussaallutik. Taakku tassa:
Aningaasaqarnermut
Akileraartarnermullu Ataatsimiititaliaq
Inatsisinut Ataatsimiititaliaq
Kukkunersiuinermut
Ataatsimiititaliaq
Nunanut Allanut
Sillimaniarnermullu Ataatsimiititaliaq
Qinigaanerup
Misilinneqarnissaanut Ataatsimiititaliaq
Taakku saniatigut ataatsimiititalianit ataavartunik arlalinnik,
amerlassusiat suliassaqarfiilu ukiumit ukiumut Inatsisartunit
aalajangersarneqarsinnaasunik Inatsisartut pilersitsisarput.
Inatsisartut ataatsimiititaliaat ataavartut maanna ukuupput:
Sanaartornermut Avatangiisinullu
Ataatsimiititaliaq
Inuussutissarsiornermut
Ataatsimiititaliaq
Ilaqutariinnermut
Peqqissutsimullu Ataatsimiititaliaq
Aalisarnermut,
Piniarnermut Nunalerinermullu Ataatsimiititaliaq
Kultureqarnermut,
Ilinniartitaanermut, Ilisimatusarnermut Ilageeqarnermullu
Ataatsimiititaliaq
Ataatsimiititaliat tamarmik immikkut ilinniagartuumik
allatseqarput, taassumalu ataatsimiigiaqqusissutit, apeqquteqaatit,
isumasioqatigiinnissamut aggersaanerit, imaqarniliat il.il.
isumagisarlugit. Aammattaaq ataatsimiititaliat siunnersuutaasa
misissorneqarneranni paasissutissanik atortussanillu
pissarsiniarnermi ataatsimiititaliat allattaat ikiuuttarpoq,
kiisalu ataatsimiititaliat sulinerannut atatillugu nalinginnaasumik
allaffissornikkut kiffartuuttarlugit. Ataatsimiititaliat
allattoqarfiat naalakkersuinikkut arlaannaannulluunniit
attuumassuteqanngilaq siulittaasumik ilaasortanillu assigiimmik
sullississalluni.
Ataatsimiititaliat sulinerisa saniatigut siunnersuisooqatigiinni
ataatsimiittartoqatigiinnilu Inatsisartunut ilaasortat aamma
peqataasarput. Inatsisitigut tunngavissalimmik nalinginnaasumik
tunuliaqutaqarluni siunnersuisoqatigiit ataatsimiittartoqatigiillu
pilersinneqartarput, matumanilu aamma siunnersuisoqatigiit
ataatsimiittartoqatigiillu suliassaannik innersuussisarluni.
