Nunat Avannarliit Killiit Siunnersuisoqatigiiffiat
Nunat Avannarliit Killiit Siunnersuisoqatigiiffiat nunat avannarliit killiit pingasut Kalaallit Nunaata, Islandip Savalimmiullu akornanni inatsisartutigoortumik suleqatigiiffiuvoq, Kalaallit Nunaanni Inatsisartut, Islandimi Altingip Savalimmiunilu Lagtingip sinniisaannit aallartitaqarfiusoq. Aallartitat tamarmik arfinilinnik ilaasortaqarput. Nunat ataasiakkaat tamarmik aallartitaasa akornannit toqqakkamik ataatsimik ilaasortaqartumik Siunnersuisoqatigiiffik siulittaasoqarfeqarpoq.
Nunat Avannarliit Siunnersuisoqatigiiffiat
Nunat Avannarliit Killiit Siunnersuisoqatigiiffiat Danmarkimi, Finlandimi, Islandimi, Norgemi Sverigemilu inatsisartut naalakkersuisullu suleqatigiiffigaat. Nunat namminersorfiusut Kalaallit Nunaat, Savalimmiut Ålandilu Danmarkip naalagaaffiata Finlandillu aallartitaannut ilaasarput, suleqatigiinnermili nammineq atitik aallartitallu nammineq qinikkatik sinniisoralugit peqataasarlutik. Nunat Avannarliit Siunnersuisoqatigiiffianni ilaasortanit 87-iusunit inissat marluk Kalaallit Nunaannut tunniunneqarsimapput.