Isumaqatigiissut
Nunani Avannarlerni Ministerit Siunnersuisoqatigiffiat nunani avannarlerni naalakkersuisut pisortatigoortumik suleqatigiiffigaat. Nunani Avannarlerni Ministerit Siunnersuisoqatigiiffiat Sverigimi, Norgimi, Finlandimi, Islandimi Danmarkimilu naalakkersuisut aammalu nunani namminersortuni Kalaallit Nunaanni, Savalimmiuni Ålandimilu naalakkersuinikkut aqutsisut suleqatigiinnerannik isumaginnittussatut pisortatigoortumik 1971-imi pilersinneqarpoq. Namminersorneq pillugu isumaqatigiissutit naapertorlugit aalajangerneq Savalimmiunit, Kalaallit Nunaannit Ålandimillu ilannguffigineqarpat Ministerit Siunnersuisoqatigiiffianni aalajangerneqartut taakkuninnga aamma malinneqartussaapput.
Siunertarisaq
Nunani avannarlerni naalakkersuisunut ilaasortat suleqatigiinnerisa nukittorsarneqarnissaanik kissaateqarneq Nunani Avannarlerni Ministerit Siunnersuisoqatigiiffiannik pilersitsinermut tunngaviuvoq. Nunani Avannarlerni Ministerit Siunnersuisoqatigiiffiat Nunat Avannarliit Siunnersuisoqatigiiffiata ataatsimiinnerini siunnersuutinik saqqummiussisarpoq, Siunnersuisoqatigiiffiup aalajangersagai ingerlateqqittarlugit, suleqatigiinnerup inerneri pillugit Nunat Avannarliit Siunnersuisoqatigiiffiannut nalunaarusiortarluni aammalu suliassaqarfiit assigiinngitsut iluini sulianik aqutsisarluni.
Aaqqissuussaaneq
Statsministerit suleqatigiinnermi pingaarnertut akisussaasuupput. Suleqatigiinneq nunani avannarlerni suleqatigiinnermut ministerinit nunat ataasiakkaat naalakkersuisuinit toqqarneqartunit ataqatigiissaarneqarpoq. Suleqatigiinnermut ministerit atorfilittanit suleqatigiissunit, Nunat Avannarliit Suleqatigiinnermut Ataatsimiititaliaannit (NSK) taaguuteqartunit, ikiorteqarput. NSK-mi ilaasortaapput nunat avannarliit ataasiakkaat nunallu namminersortut ataasiakkaat tamarmik. Suleqatigiinnermi apeqqutit sorliit suliarineqarnerat apeqqutaatillugu Ministerit Siunnersuisoqatigiiffiat katiterneqartarpoq. Ministerit Siunnersuisoqatigiiffii tamarmik atorfilittaqatigiinnik (EK-t) ataatsimik arlalinnilluunniit suliassaqarfimmik iluini suleqatigiinnermi apeqqutinik suliarinnittartunik peqarput. EK-t suliaat NSK-mit ataqatigiissaarneqarput. Ministerit Siunnersuisoqatigiiffiat EK-llu Nunani Avannarlerni Ministerit Siunnersuisoqatigiiffiata allattoqarfianit ikiorneqartarput.
Ilaasortat
Nunat Avannarliit naalakkersuisui kiisalu Ålandimi naalakkersuisut, Savalimmiuni Naalakkersuisut aammalu Kalaallit Nunaanni Namminersorlutik Oqartussat.
Kalaallit Nunaata peqataanera
Kalaallit Nunaat Ministerit Siunnersuisoqatigiiffianni siunnersuuteqarsinnaatitaalluni oqaaseqarsinnaatitaallunilu peqataavoq. Nunani Avannarlerni Ministerit Siunnersuisoqatigiiffiannit tapersersorneqartumik Nunanut Allanut Pisortaqarfimmi immikkoortortaqarfeqarpoq Namminersorlutik Oqartussat, minnerunngitsumillu suleqatigiinnermut ministerit aammalu Nunat Avannarliit Suleqatigiinnermut ataatsimiititaliaata sulinermi peqataanerannik ataqatigiissaarisuusumik. Ministerit siunnersuisoqatigiivini atorfilittanullu ataatsimiititaliani ataasiakkaani Kalaallit Nunaata peqataanera Naalakkersuisoqarfinnit Aqutsisoqarfinnillu susassaqartunit isumagineqarpoq. 2007-imi ukiakkut Nunani Avannarlerni Ministerit Siunnersuisoqatigiiffiata (suleqatigiinnermut ministerit) nassuiaat “suliniutit nunat namminersorfiusut nunat avannarliit pisortatigoortumik suleqatigiinneranni peqataanerannut nukittorsaataasinnaasut pillugit nassuiaat” akuersissutigaat.
Ålandi pillugu allagaqaat
Nunat ilaasortaasut assigalugit nunani avannarlerni suliffeqarfiit siulersuisuini ilaasortaanissamut aalajangigaq ilaatigut periarfissiivoq. Aammattaaq Ministerit Siunnersuisoqatigiivisa atorfilittanullu ataatsimiititaliat ataatsimiinnerinik siulersuinissamut periarfissiisoqarpoq.
Ålandi pillugu allagaqaatikkut periarfissiissutigineqartut sukumiinerusumik qulaajarneqarnerat suli ingerlanneqarpoq.
Oqaaseqaatit
NAPA (Nunani Avannarlerni Piorsarsimassutsikkut Attaveqaat), Nunat Avannarliit Kalaallit Nunaanni immikkoortortarisaat, Ministerit Siunnersuisoqatigiiffiata ataani suliffeqarfiuvoq 1987-imi pilersinneqartoq. NAPA-p suliassai pingaarnerit pingasuupput:
1) Nunani Avannarlerni allani kulturikkut attaveqarfinnik annertusaanissaq,
2) Kalaallit Nunaanni pissutsit Nunanut Avannarlernut paasissutissiissutigisarnissaat, Nunallu Avannarliit pillugit paasissutissiisarnissaq, kiisalu
3) Kalaallit Nunaanni kultureqarnikkut ingerlatanut tapersiisarnissaq kajumissaasarnissarlu.
Kalaallit Nunaata eqqumiitsuliornermut kulturimullu illorsua, KATUAQ, 1997-imi atoqqaarfissiortinneqarpoq, tamatumani sanaartornermut aningaasartuutinut missingersuutit pingajorarterutaat Nunani Avannarlerni Ministerit Siunnersuisoqatigiiffiannit aningaasalersorneqarlutik.
Sulianik ingerlatsisut
Nunanut Allanut Pisortaqarfimmi siunnersortaaneq Jørgen S. Søndergaard
Najugaqarfik
Nunani Avannarlerni Ministerit Siunnersuisoqatigiiffiat
Store Strandstræde 18
1225 København K
Danmark