Pinerluuteqarsimasunik Isumaginninnermut Ataatsimiititaliaq 

Kalaallit Nunaanni pinerluttartunik isumaginninnerup nunami tassani siulersugaanera Kalaallit Nunaanni pinerluttartunik isumaginninnermut ataatsimiititaliamit ingerlanneqassasoq Kalaallit Nunaanni pinerluttulerinermi inatsimmik nalunaarutip nr. 49-p § 121-ani aalajangersarneqarpoq. Ta- matuma ilutigisaanik Kalaallit Nunaanni pinerluttartunik isumaginninnerup qullersaasumik siulersugaanera eqqartuussisoqarnermut ministerimut atasoq § 120-mi aalajangersarneqarpoq.

Kalaallit Nunaanni Pinerluttunik Isumaginnittuutitat oqartussaaffii § 1-imi Kalaallillu Nunaanni Pinerluttunik Isumaginnittuutitat sulisarnissamut najoqqutassaanni 26. november 1996-imeersup §-iini 3-mi 4-ilu sukumiinerusumik nassuiaaffigineqarput.

Sulisarnissamut najoqqutassat § 1-ianni aamma 3-mi 4-milu allassimavoq, apeqqutit Kalaallit Nunaanni pinerluttunik isumaginninnermut tunngasut nalinginnaasut Kalaallit Nunaanni Pinerluttunik Isumaginnittuutitanit suliarineqartassasut apeqqutinillu pimoorussanik nalinginnaasunillu suliarinnittassasut.

Pinerluuteqarsimasunik Isumaginninnermut Ataatsimiititaliap ilaasortarissavai Landsdommeri siulittaasutut, Isumaginninnermut Suliffeqarnermullu Pisortaqarfimmi pisortaq, politimesteri, isumaginnittoqarfiup pisortaa, Dronning Ingrids Hospital-imi tarnikkut nappaatinut nakorsaaneq, ilaasortat marluk Kalaallit Nunaanni Inatsisartunit toqqakkat, ilaasortarlu ataaseq Kalaallit Nunaanni Kommuneqarfiit Kattuffiannit toqqagaq.

Ilaasortanut tamanut immikkuutaarlugit Kalaallit Nunaata Inatsisartuinit aamma Kalaallit Nunaanni Kommuneqarfiit Kattuffiannit toqqakkanut sinniisussaq ataaseq toqqarneqartassaaq. Ilaasortat allat ataatsimiinnissamut sinniisussaminnut sinnertittarsinnaapput.

Qinigaaffik

Qinigaaffik Inatsisartut qinigaaffianni atuuppoq.

Ilaasortassanik Inatsisartut toqqartuisarnerat qinersisoqarnerata kingorna inissititeriffiusumik ataatsimiinnerni tamani ingerlanneqartarpoq.

Ilaasortanik sinniisunillu Inatsisartut toqqaanerat Landsdommerimut nalunaarutigineqassaaq.

Kalaallit Nunaanni pinerluttulerinermi inatsisip kingullermik allanngortinneqarnerani Pinerluttartunik Isumaginninnermut ataatsimiititaliaq 31. december 2009 atorunnaarsinneqarpoq. Tamatuma kingunerisaanik Ataatsimiititaliami ilaasortat sinniisussallu 12. juni 2009-mi toqqarneqartut taamaallaat 2009-p naanissaata tungaanut inissisimassapput.

Saaffissaq:

Kalaallit Nunaanni Pinerluttunik Isumaginnittuutitat, Box 1040, 3900 Nuuk, oqarasuaat 32 42 00 - Nunatta eqqartuussisua