Aningaasaateqarfik Nuna Fonden 

Nuna Fonden Nuup Kommuneani angerlarsimaffeqarpoq Kalaallit Nunaanni inuussutissarsiornermut tamanullu ajunngitsuliuutaasumik siunertanut iluaqutaanissaq aammalu Grønlandsbanken A/S-imi aktianik pigisaqarnissaq pisinissarlu siunertaralugit atuuttussaq.

Tassungalu ilanngullugit ingerlatseqatigiiffiit, peqatigiiffiit, sullissiviit il.il. siulersuisut namminneerlutik nalililiinerat malillugu inunnik ikiuiniarnermut, isumaginninnermut kultureqarnermut ilisimatusarnermullu tapersersuissalluni kiisalu siunertanut siuliani taaneqartunut tunngatillugit suliassanut immikkut ittunut inummut tapiissuteqarluniluunniit taarsigassarsisitsisassalluni.

Aningaasaateqarfiup siulersuisui arfinilinnik ilaasortaqarput, taakkulu imatut qinigaasarput:

1) Kalaallit Nunaanni Inatsisartunut qinersisoqareerneri tamaasa Inatsisartut ilaasortassanik tallimanik taakkulu tamarmik immikkut sinniisussaannik ataatsimik toqqaasassapput.

2) BG Fonden ukiut sisamakkaarlugit ilaasortassamik ataatsimik sinniisussamillu ataatsimik toqqaasassaaq. Qinigaaqqittoqarsinnaavoq.

Sinniisussat Inatsisartunit toqqarneqartut aatsaat siulersuisut ataatsimiinnerinut peqataasassapput ilaasortatut toqqakkanit tallimaasunit ataaseq amerlanerusulluunniit takkutinngitsoorpata.

Siulersuisunut ilaasortat qaammatisiutit malillugit ukiumi 70-inik ukioqalerfigisap naanerani aningaasaateqarfiup siulersuisuinit tunuartassapput.'

Nuna Fondenimi siulersuisut nalinginnaasumik ukiumut pingasoriarlutik, januarimi, majimi septemberimilu, ataatsimiittarput.

Siulersuisunut ilaasortat akissarsiaqartinneqarsinnaapput.

Toqqagaasut Inatsisartunut ilaasortaanissaat piumasaqaataanngilaq. Toqqagaasut inunnik ikiuiniarnermut, isumaginninnermut, kultureqarnermut, ilisimatusarnermullu tunngasunik immikkut paasisimasaqarnissaat naatsorsuutigineqarpoq.

Piffissaq toqqagaaffik

Ilaasortat sinniisussallu tallimat Inatsisartut toqqartagaat piffissami Inatsisartut qinigaaffianni toqqarneqartarput. Nutaamik qinersinerup kingorna inissitsiterluni ataatsimiinnermi Inatsisartut nutaamik toqqaasassapput.

Saaffigisassaq:

Nuna Fonden, Postboks 614, 3900 Nuuk, telefon +299 55 07 77, telefax +299 32 12 06, mobil 55 07 77 (nal. 09.00-16.00 akorn.)

aamma E-mail, Nunafonden@Nunafonden.gl

Nittartagaq www.nunaFonden.gl