Peqqissutsimut Ataatsimiititaliap Dronning Ingridip Napparsimavissuani kiisalu sinerissami  napparsimaveqarfinni peqqissaasunik atorfeqavissunik annertuumik amigaateqartoqarnera ernumanartoqartippaa. Taamaammat Peqqissutsimut Ataatsimiititaliap Naalakkersuisooqatigiinnut piumasaqarluni siunnersuuteqarpoq  2009-mut Inatsisartut Aningaasanik Inatsisissaannut siunnersuummut Dronning Ingridip napparsimavissuani ilaatigut nunatta avataani peqqissaasunut aningaasarsiassanut atorneqartartuniik, peqqissaasut atorfeqavissut aningaasarsiaasa isumaqatigiissuteqarfiginiarnissaannut aningaasanik illikkartitsisoqassasoq.

Peqqissutsimut Ataatsimiititaliap peqqinnissaqarfimmi allatut iliorluni aaqqiiniarnissaq pisariaqalivissutut isigaa, kaammatuutigissallugulu peqqinnissaqarfimmi aalaakkaasumik peqqissaasunik allanillu sulisoqalernissaq angutsersinnaajumallugu makku suliniutigineqassasoq:

·        Pisortat sulliviini malunnaatilimmik unammillersinnaaasumilli aningaasarsiaqartitsisoqalissasoq.

·        Nunanut avannarlernut nunanullu allanut sulisussarsiorluni ussassaaraluni angalasarnerit angalasarnerit, -pineqartit tikillugit inuttarsillugit.

·        Peqqinnissaqarfimmi sulilersinnaasunut piukkunnaateqartunut ussassaarineq, mannanmut atorneqareersoq www.nextjobgreenland.dk kisiat atornagu.

·        Tapisiaqartitsisarnerit, tassalu bonusisitsisarnerit aqqutissiuunniarneqassasut , ukiunut kittaartumik  qaffaateqarsinnaasut.

·        Paarlaasseqatigiittarnerit assigisaallu aqqutigalugit ilinniakkaminnik naammasserlaat suliffigisaminniiginaqqullugit aaqqissuussisoqassasoq.

·        Taartaasartussarsiorfik Namminersornerullutik Oqartussanit ingerlataq pilersinneqarniarneqassasoq.

·        Nunami namminermi Sulinasuartartussanik pilersitsineq, National Task Force, siunissaq ungasinnerusoq eqqarsaatigalugu peqqinnissaqarfimmi aaqqiiniartussanik

·        Taamaaliornikkut taartaasartunut aningaasartuutit Kalaallit Nunaanni pisortaniiginnarsinnaaqqullugit.

Inatsisartut Peqqissutsimut Ataatsimiititaliaat isumaqarpoq aningaasat maannakkut taamatut atorneqaannartarnerat allanngortilluinnartariaqartoq siunissami Nunatsinni aningaasat kaaviaartinneqarsinnaaqqullugit aammalu aningaasat Nunatsinni peqqinnissaqarfimmi aalajangersimasumik atorfeqartinneqareersunut aalaakkaasumillu sulisuulerumaartussanut immikkoortinneqarsinnaaqqullugit.

Annertunerusumik paasisaqarumasut siulittaasumut Vittus Mikaelsenimut oqarasuaat 59 82 12-mut sianerlutik saaffiginnissinnaapput.