Aningaasaqarnermut Akileraartarnermullu Ataatsimiititaliaq
Inatsisartut Aningaasaqarnermut Ataatsimiititaliarisimasaata aammalu Akileraartarnermut Akitsuusiisarnermullu Ataatsimiititaliarisimasaata suliassaqarfiisa ataatsimoortinnerisigut Aningaasaqarnermut Akileraartarnermullu Ataatsimiititaliaq pilersinneqarpoq. Aningaasaqarnermut Ataatsimiititaliaq ataatsimiititaliatut nangitsisutut isigineqarpoq, ataatsimiititaliarlu nutaaq anginerusorlu Aningaasaqarnermut Ataatsimiititaliamik taaguuteqaannarpoq.
Aningaasanut inatsisissatut siunnersuut aammalu ilassutitut aningaasaliissutinut inatsisissatut siunnersuut kiisalu akileraartarnermut inatsimmut allannguutissatut siunnersuutit kisimik Aningaasaqarnermut Ataatsimiititaliamit nalinginnaasumik suliarineqartarput. Tamatuma saniatigut Naalakkersuisut aningaasaliissuteqarnissamik qinnuteqaataat amerlasuut ukiut tamaasa suliarineqartarput.
Aningaasaliissuteqarnissamik qinnuteqaat Aningaasaqarnermut Ataatsimiititaliamit akuersissutigineqarpat Inatsisartunit tamarmiusunit akuerineqartutut Naalakkersuisut inissisimassapput. Tamatuma saniatigut pissaanermik ingerlatsisunik (Naalakkersuisunik) nakkutilliinermi ilaatut namminerlu naliliinini naapertorlugu qulequttanik suliassaqarfimmi iluaniittunik Namminersorlutillu Oqartussat aqutsinerannut tamarmut tunngasinnaasunik ataatsimiititaliaq samminnissinnaavoq. Kiisalu qulequttanik aningaasaqarnermut tunngasunik, soorlu nunarsuarmioqataanermut, piffissamut ungasissumut aningaasaqarnikkut pilersaarusiornermut, aningaasaqarnikkut attassisinnaanermik ajornartorsiutinut, nunani tamalaani aningaasaqarnermut il.il. tunngasunik samminnissinnaavoq.
