Nunatta Karsiata naatsorsuutaanik kukkunersiuisarneq BDO-mit tiguneqassaaq

Kukkunersiuinermut Ataatsimiititaliamit inassutigineqartut tunngavigalugit Nunatta Karsiata 2024-mut Naatsorsuutai ulloq 6. november 2025 Inatsisartunit akuersissutigineqarput. Ilutigisaanik kukkunersiuisoqarfik naalagaaffimmit akuerisaq BDO Nunatta Karsiata 2026-mut Naatsorsuutaanik kukkunersiuisussatut nutaatut toqqarneqarpoq. BDO Nunatta Karsiata 2025-mi naatsorsuutai pillugit kukkunersiuilluni suliassaq Inatsisartut Siulittaasoqarfiata isumaqatigiissuteqarfigineratigut tigoriissavaa.

Suliassaq Namminersorlutik Oqartussaqalinnginneranili suliffeqarfiup kukkunersiuisartup Deloitte-p isumagisarinikuuaa, kisiannili taakkua 2022-mi suliffeqarfitsik Kalaallit Nunaanniitikkunnaarpaat. Tamatuma kingorna Namminersorlutik Oqartussanut kukkunersiuinermik suliassatik Danmarkimiit suliarisalernikuullugit.

Kukkunersiuinermik suliassap kukkunersiuisoqarfimmit nunatsinni aalajangersimasumik ingerlatsisumit sapinngisamik isumagineqarnissaa Inatsisartut Siulittaasoqarfiata Kukkunersiuinermullu Ataatsimiititaliaata kissaatigisimavaat. Tamatumanilu kukkunersiuisoqarfimmik nunatsinni aalajangersimasumik ingerlatsisumik suliassamillu tiguserusuttumik aammalu suliassamik tamatuminnga manna tikillugu annertussutsip pitsaassutsillu assinganik isumaginninnissamut nukissaqarlunilu piginnaasaqartumik nassaartoqarnissaa pisariaqartinneqarsimavoq.

Taamaattumik BDO Nuummi allaffeqartoq ukiormanna aallartittumik isumaqatigiissuteqarfigineqarsinnaanera Kukkunersiuinermut Ataatsimiititaliamit pitsaasuusorineqarluinnarpoq.

Deloittep ukiorpassuarni tunniusimalluni sulisimaneranut pitsaasumillu suleqatigisimaneranut Kukkunersiuinermut Ataatsimiititaliaq qujarusuppoq. BDO pitsaasumik sivisuumillu suleqatiginissaanut ataatsimiititaliaq qilanaarpoq.

Iddimanngiiu Jensen Bianco

Kukkunersiuinermut Ataatsimiititaliap Siulittaasua

Annertunerusumik paasisaqarusukkaanni ataatsimiititaliap siulittaasua oqarasuaammut attavigineqarsinnaavoq +299 54 88 44