Sanaartornermut ataatsimiititaliaq Utoqqarmiut Kangerluarsunnguani erngup nukissiorfia, Nuup eqqaaniittoq orneqqammerpaa

Ataatsimiititaliaq 7. november 2025-mi Utoqqarmiut Kangerluarsunnguani erngup nukissiorfiata ingerlanneqarnera pilersuisinnaassusialu paasisaqarfiginiarlugit orneqqammerpaa.

Erngup nukinganik nukissiorfiup nunatsinni illoqarfiup pingaarnersaata nukissiornikkut pilersorneqarneranik qulakkeerinninnissami qitiusumik inissisimasup allililerneqarnissaanut pilersaarutit pillugit paasissutissanik kingullernik pissarsinissaq angalanermi siunertaavoq. Suliniutip teknikikkut assartuinikkullu unammilligassartai  kiisalu allilerineq Nuup siunissami nukissiornikkut pisariaqartitaasa naammassineqarnissaannut qanoq tapeeqataasinnaanersoq ataatsimiititaliap takuniaanermini paasisaqarfigai.

Nuummi innuttaasut amerliartortillugit patajaatsumik piujuaannartitsinissamillu tunngaveqartumik nukissiornikkut pilersuisoqarnissaanik pisariaqartitsineq annertusiartorpoq. Namminersorlutik Oqartussat suliffeqarfiutaat NunaGreen Construction Nuuk A/S Utoqqarmiut Kangerluarsunnguani erngup nukissiorfiata allilerneqarneranik annertuumik maannakkut suliaqarpoq.

Nukissiorfik maanna atuuttoq 1993-imi atulersinneqartoq 45 MW-imik pilersuisinnaassuseqarpoq. Maannakkut erngup nukinganik nukissiorfimmut pioreersumut atasumik erngup nukinganik nukissiorfimmik nutaamik pilersitsinikkut innaallagissiorneq 76 MW-imik annertusisineqassaaq taamaalilluni pilersuisinnaassusia katillugu 121 MW-ip tungaanut qaffassalluni.

Ataatsimiititaliap siulittaasuata takuniaaneq nukissiorfinni ataatsimiinnernik malitseqartinniarpaa aammalu pilersuinermi pissutsit tamakkiisumik paasisaqarfiginiarlugit Nuummi attaveqaasersuutitigut pingaarutilinnut allanut takuniaanissaq pilersaarutigalugu.  

Justus Hansen
Sanaartornermut ataatsimiititaliami Siulilttaasoq 
Annertunerusumik paasisassarsiorniaraanni siulittaasoq mobilimut +299 53 12 10-mut attavigineqarsinnaavoq