Inuussutissarsiornermut Aatsitassanullu Ataatsimiititaliaq Toronto, Canadami aatsitassanut saqqummersitsinermiikkami (PDAC-mi)

Nunarsuarmi aatsitassanut saqqummersitsivinnit pulaarneqarnerpaasartoq PDAC Inuussutissarsiornermut Aatsitassanullu Ataatsimiititaliap peqataaffigeqqammerpaa.

Saqqummersitsineq ulluni 1.-4. marts ingerlanneqarpoq.

Nunatsinnut tunngassuteqartunut saqqummersitsivimmi pisunut ataatsimiititaliaq arlalinnut peqataavoq, ilanngullugu immikkut Kalaallit Nunaata Ulluanik taaneqartartoq peqataaffigalugu.

Ataatsimiititaliap ilanngullugu Torontomi Danskit Generalkonsuleqarfiani ataatsimiinneq peqataaffigaa, tassani akuersissutillit immikkut tamarmik killiffimminnik paasissutissiillutik.

Nunap inoqqaavisa kiisalu Canadami aatsitassanut atortussiornerup ineriartornera pillugu ataatsimiititaliap saqqummersitsivimmi ingerlanneqartoq naggataatigut peqataaffigaa.

Mariane Paviasen Jensen

Inuussutissarsiornermut Aatsitassanullu Ataatsimiititaliami siulittaasoq

Paasisaqarnerorusukkuit ataatsimiititaliap siulittaasua attavigisinnaavat oqarasuaatikkut: 25 01 69-imut.