Nunat Avannarliit Siunnersuisoqatigiiffiata februaarimi ataatsimiinnera

Nunat Avannarliit Siunnersuisoqatigiiffiata februaarimi ataatsimiinnera Roskildemi Danmarkimi ulluni 23.- 24. februar ingerlanneqarpoq.

Nunat Avannarliit Siunnersuisoqatigiiffiannut nunatsinnit aallartitat ukuupput:

Justus Hansen, siulittaasoq

Mariane Paviasen Jensen

Ukioq manna aasaanerani ataatsimiinneq nunatsinni Nuummi ulluni 22.-23. juni 2026-mi ingerlanneqassasoq Nunat Avannarliit Siunnersuisoqatigiiffiata siulittaasoqarfiata Roskildemi februaarimi ataatsimiinnermini aalajangerpaa. Aasaanerani ataatsimiinneq ileqqut malillugit nuna siulittaasoqarfiusoq qaaqqusisuussaaq. 

Taamatut aalajangerneq Kalaallit Nunaannut nunanilu avannarlerni suleqatigiinnermut tapersersuinermut erseqqissumik oqariartuutitut isigineqassaaq. Nunat Avannarliit Siunnersuisoqatigiiffiata præsidentia Finlandimeersoq ataatsimiinnissap Nuummut inissinneratigut Kalaallit Nunaata nunat avannarliit ataatsimoorneranni pingaarutilittut atuuffeqarnera erseqqissarumavaa. Aasaanerani ataatsimiinnermi nunani avannarlerni maanna pisut pillugit oqaluuserisassat aammalu nunani avannarlerni nunat sumiiffiillu namminersorfiusut akornanni suleqatigiinnerup ingerlateqqinneqarnissaa pillugit oqallinnissamut Siulittaasoqarfimmi ilaasortat katersuutsinneqassapput.

Annertunerusumik paasissutissat Nunat Avannarliit Siunnersuisoqatigiiffiani kalaallit aallartitaannut saaffiginninnikkut pissarsiarineqarsinnaapput.

Inussiarnersumik inuulluaqqusillunga
Justus Hansen
Kalaallit aallartitaannut siulittaasoq – Siulittaasoqarfimmi ilaasortaq