Inatsisartut Siulittaasuata Kim Kielsenip ulloq 22. december 2025-mi Nuummi Hans Egedep Illuani Nikolaj Ezekiassen sølviusumik Nersornaaserpaa

Inatsisartut Siulittaasuata Kim Kielsenip Nuummi Hans Egedep Illuani nalliuttorsiorpalaartumik katerisimaarnermi Nikolaj Ezekiassen sølviusumik Nersornaaserpaa. 

 

Nikolaj Ezekiassen ukiorpassuarni namminersortutut inuussutissarsiuteqartutut suliffeqarfiutiminilu sanasunngornianik ilinniartuuteqartarsimanerminut aammalu immikkut ittumik inuusuttut sanasutut ilinniarnerminnik naammassinninnissaannut periarfissiisarsimanerminut sølviusumik Nersornaaserneqarpoq.

Inatsisartut Siulittaasuata Nikolaj Ezekiassenimut oqalugiarnermini ilaatiut makku erseqqissaatigai:

“Inatsisartut Siulittaasoqarfiata sølviusumik Nersornaaserniarlutit aalajangersimavaa, ukiorpassuarni nersortarialimmik namminersortutut inuussutissarsiuteqartutut suliffeqarfiutinnilu annertuumik immikkullu ittumik inuusuttut suliffeqarfiutinni sanasunngornianik ilinniartuuteqartarsimanerit  pillugu sulisimanerit, kisiannili aamma immikkut ittumik inuusuttut sanasutut ilinniarnerminnik naammassinninnissaannut periarfissittarsimagakkit. 

Suliffeqarfiutigisat Sanasoq 1999-mi pilersippat, sannavissat nammineq naqqaniit sanariarlugu ukiut ingerlanerini  ineriartortissimavat. Maluginiarneqarsimavoq, immikkut ittumik inuusuttunik ilinniartuuteqarnissaq pingaartikkit, sulisullu ilinniagaqanngitsut ilinnialernissaannik annertuumik kaammattortarsimagitit illillu suliffeqarfiutinni ilinniartuunissaannut inissaqartittarlugit. Suliniutit taamaattut nersualaagassaapput allanullu aamma isumassarsiorfiusinnaallutik.    

Suliffeqarfiutit kisiat aallussimanngilat. Inuusuttut meeqqat atuarfiannit naammassinninngitsoorsimasut aamma inissaqartittarsimavatit, ingerlariaqqinnissaannut periarfissarsiuullugit, allaat aamma immikkut akuersissuteqartilerlugit illinnialersinnaalernissaannut periarfissiuuttarsimavatit.
Oqaatigineqartarpoq ilinnut suliffeqarfiutit inuusuttunik ilinniartuuteqarnissaq ilisarnaatigilersimagissi tamannalu qujamasuutissaavoq.

Peqqissutsikkut atukkatit pissutigalugit suliffeqarfiutivit erninnut ingerlateqqinnissaa qulakkeersimavat pingaartitarisavilli inuusuttunut suliniutitit aamma ingerlanneqartuarnissaat qulakkeerniarsimallugu.
Tamatuma saniatigut inuiaqatigiinni suliffeqarfinni pingaarutilinni allani aamma suliaqartarsimavutit KTI-mi Illuut A/S-llu siulersuisuinut ilaasortaasarsimavutit soorluttaaq siornatigut GA ullumikkut taaguuteqartoq Sulisitsisut. Taaneqartumi kingullermi pitsaasumik kinguneqartunik sulisitsisut peqatigiiffianni kalaallit suliffeqarfiutaasa siuarsarneqarnissaat ilungersuutigisarsimavat. Soorluttaaq ukiut ingerlanerini nammineq piumassutsinnik Neriuffimmi suleqataalersimasutit ullumikkumullu tamanna suli ingerlallugu. 

Inuiaqatigiit pillugit suliniuteqartarsimanitit imaannaanngillat annertuumillu sunniuteqartuarput.”

 

 

 

Siulittaasoqarfik sinnerlugu
Inatsisartut Siulittaasuat Kim Kielsen