Inatsisartut Siulittaasuata Kim Kielsenip ulloq 22. december 2025-mi Nuummi Hans Egedep Illuani Jess G. Berthelsen sølviusumik Nersornaaserpaa

Inatsisartut Siulittaasuata Kim Kielsenip Nuummi Hans Egedep Illuani nalliuttorsiorpalaartumik katerisimaarnermi Jess G. Berthelsen sølviusumik Nersornaaserpaa.

Jess G. Berthelsen ukiorpassuarni sulisartut kattuffianni SIK-mi Soraarnerussutisiaqarfimmilu SISA-mi sunniuteqarluni suliuarsimanerminut sølviusumik Nersornaaserneqarpoq.

Inatsisartut Siulittaasuata Jess G. Berthelsenimut oqalugiarnermini ilaatigut makku erseqqissaatigai:

“Inatsisartut Siulittaasoqarfiata sølviusumik Nersornaaserniarlutit aalajangerpaa. Nersorniarneqarputit ukiorpassuarni sulisartut kattuffianni SIK-mi Soraarnerussutisiaqarfimmilu SISA-mi sunniuteqarlutit suliuarsimaninnut, ukiorpassuarnilu Siulitaasutut qinigaaqqittarlutit qanittumilu ukiuni 35-ni SIK-mi suliniuteqarsimanerit nalliuttorsiutigineqarluni.

Sulisartut kattuffianni SIK-mi ukiorpassuarni sulisimaninni, immikkut ittumik sulisartut akissarsiakinnerpaat atugaat ukkatarisimavatit pitsaanerpaamillu atugaqarnissaat anguniartuarsimavat siulittaasutut annertuumik sukataaruteqarnikkut. Taamatullu sumiluunniit pisortat suliffeqarfiutaanni, peqqinnissaqarfimmi aalisakkerivinni niuertarfinniluunniit sulisuuppata tamaasa sullittarlugit. 

1994-mi sulisartut ataatsimoortumik isumaqatigiissutit  malillugit sulisunut Soraarnerussutisiaqarfik pilersinneqassasoq isumaqatigiissutigineqarpoq. Soraarnerussutisiaqarfiup Kalaallit Nunaanni angerlarsimaffeqarnissaa anguniarneqarsimavoq, taamaaliornikkut ilaasortat innarluutillit-, aapparisap- aamma meeqqat pissarsisarnissaat pingaartillugit anguniarneqarlutik. Ukiut tallimat ingerlaqqaartariaqarsimapput 1. juli 1999-mi ataatsimeersuarnermi SISA-p Aningaasaqarnermut Nakkutilliisoqarfimmit akuersissummik tunineqarnissaanut. Taamaammat SISA-p ineriartorneranut  ilaasortallu Soraarnerussutisiassatut katersaasa aqunneqarnerannut  annertuumik ineriartortitseqataallutillu pingaarutilimmik inissisimallutit. 

SISA kingullertigut Soraarnerussutisiassatut katersanit aalisakkanik suliffissuaqarnermut aningaasaliivoq,  nunatsinni aningaasaliisoqarnissaa ilinnut pingaartuusimavoq, soorluttaaq SISA pilersinneqaqqaarneranili  inissianik niuerfinnut aningaasaliisoqarnissaa aalajangiusimalluinnarsimagit. Sulisartut kattuffiani siulittaasutut najukkani inuussutissarsiortut salliutinniartuarsimagitit, aningaasat katersat nunatsinni inuit pillugit aamma nunatsinniiginnarnissaat kissaatigalugu anguniartuarsimagit qularutissaanngilaq. 

Sulisartut kattuffianut siulitaasutut, sulisartut akissarsiaannut, peqqissusaannut allanulluunniit pingaartitannut, soorlu kikkut tamarmik suliffeqarfinni naligiissumik atugaqarnissaannut piumasaqaatinut tunngappata, tamat oqallinnerannut akuttunngitsumik akuusarputit.

Inuiaqatigiit tunngavimmigut ingerlanneqarnera amerlasuutigut allanngoriartornerani  uninnak eqqummaariffigalugit akuuffigiuarpatit tamakkulu tamaasa  sulisartut kattuffianni ilaasortanut ulluinnarni atugaannut nalimmassartarsimavatit.

Inuiaqatigiit pillugit suliniuteqartarsimanitit imaannaanngitsuupput annertuumillu sunniuteqartuarput.”

 

 

 

Siulittaasoqarfik sinnerlugu
Inatsisartut Siulittaasuat Kim Kielsen