Inatsisartut Siulittaasuata ulloq 28. januar 2026 Ilulissani Hotel Arcticimi Marie Sandgreen aamma Gerth Sandgreen sølviusumik Nersornaaserpai

Inatsisartut Siulittaasuata Kim Kielsenip ulloq 28. januar 2026 Ilulissani Hotel Arcticimi nalliuttorsiorpalaartumik katerisimaarnermi Marie Sandgreen aamma Gerth Sandgreen sølviusumik Nersornaaserpai.

Marie Sandgreen sølviusumik Nersornaaserneqarpoq
Marie Sandgreen sølviusumik Nersornaaserneqarpoq ilaqutariittut ingerlatamik ineriartortinneqarnerat eqqarsaatigalugu ilaqutariit ataqatigiinnerat ikorfartorniarlugu pinngitsoorneqarsinnaanngitsumik suliaqarsimanera pissutigalugu.

Inatsisartut Siulittaasuata Marie Sandgreenimut oqaaseqarnermini ilaatigut erseqqissarpai:

” Tamatta nalunngilarput suliffeqarfimmik ilaqutariittut pigisamik iluatsitsissagaanni tunuliaqutaqarluarnissaq, sulerulunnissaq tapersersorneqarnissarlu pisariaqartut. Angusat tamakku taamaallaat ataqatigiinnikkut allanillu pilliuteqartariaqartarluni sulerulunnikkut anguneqarsinnaapput.

Marie, ilaqutariittut ingerlatassi ineriartortinneqarnerat eqqarsaatigalugu ilaqutariit ataqatigiinnerat ikorfartorniarlugu pinngitsoorneqarsinnaanngitsumik sulisimanerit nersorniarlugu nersornaaserniarlutit siulittaasoqarfiup aalajangersimavaa. Ukiut ingerlanerini illit uiillu ilaqutariippassuarnut suliffissanik qularnaarinnissinnaasimanissinnut nalilerneqarsinnaanngitsumik ikorfartuisuusimavutit. Suliffeqarfimmik angisuumik ingerlatsissagaanni ilaqutariittut maattuujusariaqarpoq piginnittutullu tunniusimasariaqarluni.

Inatsisartut Siulittaasoqarfiata sølviusumik Nersornaaserpaatsit pingaarutilimmik piffissamilu sivisuumi illit uivillu ilaqutariittut ingerlatassi, ukiullu ingerlanerini ilaqutariippassuarnut patajaatsumik suliffissaqartitsisimasut, ineriartortinneqarnerinut pinngitsoorneqarsinnaanngitsumik nalilerneqarsinnaanngitsumillu tapersersuisimanerit pissutigalugu.”

Gerth Sandgreen sølviusumik Nersornaaserneqarpoq

Gerth Sandgreen sølviusumik Nersornaaserneqarpoq aalisarnermik inuussutissarsiuteqarnermi nersortarialimmik suliniuteqarsimanini ukiorpassuarnilu ilaqutariippassuit isertitaqarsinnaanissaannik qularnaarinnittumik ilaqutariinnit pigineqartumik ingerlataqarsimanini pissutigalugit.

Inatsisartut Siulittaasuata Gerth Sandgreenimut oqaaseqarnermini ilaatigut erseqqissarpai:

”Taamaattumik siulittaasoqarfiup immikkorluinnaq ittumik aalajangersimavaa suliffeqarfimmik ilaqutariittut pigisamik ukiorpassuarni illit nuliavillu ingerlatsisimanissinnut ilaqutariippassuillu sulinikkut isertitaqartarsimanerannik qularnaarinnissimanissinnut nersorniarniarlusi.

Taamaalilluni Inatsisartut Siulittaasoqarfiat aalajangersimavoq illit Gerth sølviusumik Nersornaaserniarlutit, aalisarnermik inuussutissarsiuteqarnermi nunatsinnut pingaarutilerujussuarmik nersortarialimmik annertuumik suliaqarsimanerit pissutigalugu.

Ukiorpassuarni, nuliat peqatigalugu, namminersortutut aalisarnermik ingerlatsisimavutit. Aalisarnermillu inuussutissarsiutip ingerlaavartumik atugassaqarnikkut nikerarfiusumi naleqqussartuarlutit ingerlatsivutit. Aalisarnermillu inuussutissarsiornermik inuusuttut ingerlatsilersut nutaat illit misilittakkannik ukiut ingerlanerini avitseqatigalugillu ikorfartortarsimavatit, sorluttaaq Ilulissani aalisakkeriviit inerisarneqarnerini tunniusseqataasarsimasutit. Allaat utoqqaliarsaaleriartorninni unnuisarfinnik pilersitsinikkut suliffeqarfiutit nunami suliassaqarfiusunik aamma annertusarpat, tamatumani takornariaqarnikkut inuussutissarsiorneq suleqataaffigalugu.

Aalisarnermik inuussutissarsiuteqarneq sumiiffimmi isertaqarnermi tunngaviuvoq pingaarutilerujussuaq, suliffissaqarnikkut pingaaruteqarluni minnerunngitsumillu nunatta karsiata isertitaqartarneranut tunngaviuvoq, atugarissaarnitta tamatta pingaartitatta qaffasissuanik tamatsinnut qularnaarinniffiusoq.

Aalisarneq aamma inuussutissarsiutaavoq ingerlaavartumik naleqqussartuarnissamut annertuumik piumasaqarfiusoq suliffeqarfinnillu patajaatsunik suliffissanik pitsaasunik qularnaarisinnaasunik piumasaqarfiusoq.”

Siulittaasoqarfik sinnerlugu

Kim Kielsen
Inatsisartut Siulittaasuat