Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap Ilulissani Perorsaanermik Ilinniarfimmut pulaarnera

Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliaq piffissami ulloq 20. august – 21. august 2026 Ilulissani paasisassarsiorluni angalavoq.

Ilulissani Perorsaanermik Ilinniarfimmi ilinniartitaanerup iluani ineriartornerup paasisaqarfigineqarnissaa paasisassarsiorluni angalanermi siunertarineqarpoq. Forstanderi Ulunnguaq Markussen, pisortap tullia Ane Solveig Hansen aammalu ilinniartitaanermut pisortaq Benedikte Petersen Løvstrøm ataatsimiititaliap ataatsimeeqatigai.

Perorsaanermik Ilinniarfiup sammisat kingulianiittut ataatsimiititaliamut saqqummiuppai:

Ilisarititsineq

•    Perorsaanermik Ilinniarfiup ilisaritinnera (aaqqissuussaaneq, aningaasaqarneq ass.)
•    Perorsaanermik Ilinniarfiup inuiaqatigiinnut ilinniartitaanikkullu atuuffia
•    Perorsaanermik Ilinniarfiup inatsisip siunertaanik piviusunngortitsiniarnera
•    Perorsaanermik Ilinniarfiup inuussutissarsiornermut sulisoqarnermilu politikikkut anguniakkanut akuunera
•    Ineriartortitsinermut iliuusissatut pilersaarutit

Ilinniartitaanermi pikkorissarnermilu ingerlatsineq

•    Ilinniakkat
•    Ilinniakkanut pilersaarutit
•    Ilinniartoqassuseq
•    Ilinniarnermi avatangiisit
•    Atugarissaarneq attassiinnarnerlu
•    Praktikernerup ingerlanera praktikertarnerullu ataqatigiissarneqartarnera
•    Pikkorissarneq ilinniaqqittarnerlu
•    Naammassisat kisitsisillu (naammassisut, taamaatiinnartartut, akuerineqartut ass.)
•    Ilinniartunut ineqarfiit pillugit ingerlatsineq
•    Meeqqat atuarfianniit inuussutissarsiutinut ilinniartitaanernut ikaarsaarneq
•    Inuussutissarsiutinut ilinniartitaanermit suliffeqarfinnut ingerlaqqinneq kiisalu ingerlariaqqilluni ilinniaqqinneq
•    Avatangiisini sinaakkutit
•    Unammilligassat

Pitsaassutsip qulakkeerneqarnera nakkutilliinerlu

•    Ilinniarfimmi pitsaassutsimik ingerlataqarneq
•    Naalakkersuisut nakkutilliinerat suleqatiginerallu

2026-p ingerlanerani Ilinniarnertuunngorniarfiit, qitiusumik ilinniarfiit, universitetilu ilisimatitsiviusumik ataatsimeeqatigineqartarnissaat ataatsimiititaliap pilersaarutigisimavaa. Nunatsinni ilinniartitaanermi ilinniarfiit ataatsimut paasisaqarfiginissaat ataatsimiititaliamit immikkut kissaatigineqarpoq.

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliap ilaasortarai Nivi Heilmann Efraimsen (siulittaasoq, Inuit Ataqatigiit), Isak Johannessen (siulittaasup tullia, Naleraq), Margrethe Thårup Andersen (Demokraatit), Karen-Marie Kyed Frederiksen (Demokraatit) aamma Nivi Rosing (Inuit Ataqatigiit). Isak Johannessenimut sinniisussaq, Mette Arqe-Hammeken (Naleraq), paasisassarsiorluni angalanermi peqataavoq. Karen-Marie Kyed Frederiksen pisussaaffimminik allanik pisassaqarami paasisassarsiorluni angalanermi peqataanngilaq.

Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliaq sinnerlugu
Inussiarnersumik inuulluaqqusillunga
Nivi Heilmann Efraimsen, siulittaasoq
Annertunerusumik paasisaqarusukkaanni ataatsimiititaliap siulittaasua attavigineqarsinnaavoq uunga +299 29 58 79.