Oqalaarsinnaavunga ….

Inatsisartut siulittaasuattut qanittukkut tusagassiorfinnut nalunaaruteqarlunga Inatsisartunut qinersisoqareernerata kingorna inatsisartutigoortumik sulinermi tunngaviusumik atugassarititaasut ilaat qulaajarniarsimavakka isummersorfigalugillu:

 

Tassalu naalakkersuisuutitaqalersut nutaat kikkuugaluartulluunniit nassuerutigisariaqartarmassuk pissaaneq tigusartik akeqartartoq (isummat naapeqatigiissinniarneqartarnerisigut) killeqartarlunilu (minnerunngitsumik aningaasanut tunngasut eqqarsaatigalugit).

 

Taamatullu aamma anguniakkat neriuutillu ilaat taamaattumik aamma taamaatiinnarneqartariaqartarmata unitsikkallarneqarallarlutilluunniit – aamma anguniakkat neriuutillu naalakkersuisuutitaqartuni partiit ataasiakkaat qineqqusaarutigisimasaat eqqarsaatigalugit.

 

Tusagassiorfinnut nalunaarutinni allaaserivara tamanna qaqugukkulluunniit illuatungiliuttunut periarfissatsialaasoq naalakkersuisuutitaqartunut partiinullu taakkununnga ilaasunut innuttaasut tatiginninnerat sanngiillisinniarsarissallugu. Periarfissaq tamanna tunuarsimaarfigineqarneq ajorpoq.

Tamannalu tassa tusagassiorfiit ilaannit partiinik illuatungiliuttunik naveersinertut oqaatiginiarneqarpoq.

 

Naveersinerunngilarli.

 

Tusagassiorfinnut nalunaarutiga taamatuttaaq illuatungiliuttunik nipangersaaniarnerunngilaq: Partiinik naalakkersuisuutitaqartunik qineqqusaarnermi neriorsuutiminnik eqquutsitsinnginnerarlugit assuarinnittarneq naalakkersuinikkut toortaaneruvoq nalinginnaasumik atorneqartartoq tamakkiisumillu akuerineqarsinnaasoq. Ullumikkut partiit illuatungiliuttut periaatsimik tamatuminnga atuisut siulliunngillat kingulliussagunaratillu. Naalakkersuinikkut qalliuniarnerup tamanna ilagiinnarpaa…

 

Tusagassiorfinnut nalunaarutiga taamatuttaaq naalakkersuisuutitaqartunik illersuinertut oqaatiginiarneqarpoq, tamannalumi aamma ilumoortortaqartutut oqaatigineqarsinnaavoq, tassami atugassarititaasut naalakkersuisuutitaqartunut kikkuugaluartunulluunniit, taamalu aamma ullumikkut naalakkersuisuutitaqartunut, atuuttut ilaat tikkuarniarsimavakka. Taamaattorli partiinit aalajangersimasunit qineqqusaarnermi neriorsuutigisat isummerfiginngilakka, tamannalumi aamma Inatsisartut Siulittaasuannut pissusissamisoortussaanngilaq.

 

Taamaakkaluartorli partiit illuatungiliuttut sinniisaat tusagassiorfinnut nalunaarummik, eqqornerusumilluunniit oqaatigalugu Inatsisartut siulittaasuattut nassiussisuuninnik, isornartorsiuipput. Tamanna ippinnartoqanngilaq – naalakkersuinikkut qalliuniarnerup tamanna ilagiinnarpaa akuerineqartariaqartoq. Tamanna (tusagassiorfiit ilaasa naliliinerattut) ersiutaanngilaq Inatsisartut Siulittaasuata illuatungiliuttullu isumaqatigiinngingaarnerannut – uanga taamatut isumaqanngilanga….

 

Qisuariarnerit apeqqutaatinnagit taava partiit taakku, partiillumi allat, naatsorsuutigisariaqarpaat uanga Inatsisartut Siulittaasuattut aamma siunissami ilaanneeriarlunga innuttaasut oqartussaaqataanerat eqqarsaatigalugu atugassarititaasut ineriartornerillu pillugit isummersortassagama, isummersuutikkalu tamanut saqqummiuttarlugit.

 

Taamaaliornikkut ilaatigut illuatungiliuttut partiivi – ilaatigullu partiit naalakkersuisuutitaqartut Naalakkersuisulluunniit – narrujuummisinneqarsinnaapput, kisiannili aamma tamanna innuttaasut akornanni eqqarsaatiginnilluaqqinnissamut oqallinnermillu pilersitsinissamut peqataasinnaalluni.

 

Tusagassiorfinnullumi nalunaarutiga kingulleq oqallinnermik pilersitsivoq – naak immaqa oqartoqarsinnaagaluartoq oqallinnermi Inatsisartut siulittaasuata naqisimaneqarani oqaaaseqarsinnaanerata sumut killeqarnera annerusumik sammineqaraluartoq, isummat saqqummiussama imarisai pinnagit.

 

Tamannali aamma innuttaasut oqartussaaqataanerat eqqarsaatigalugu oqallinneruvoq pisariaqarsinnaasoq.

 

 

 

Ikinngutinnersumik inuulluaqqusillunga

 

Kim Kielsen

Inatsisartut Siulittaasuat