Inatsisartut soriarsinnaajunnaarsinneqartut – taasinissat ilaasortanit akornuserneqarput

 

Oqaluuserisassani immikkoortut arlallit Inatsisartunit ullumi kinguartinneqartariaqarsimapput. Immikkoortut pineqartut taasissutigineqarnissamut piareeqqagaluarput – ilaasortalli piareeqqanatik. Imaluunniit naammattumik amerlassuseqaratik: Inatsisartummi aalajangiisinnaanngillat ilaasortat affaannit ikinnerusut najuuppata taaseqataappatalu.

 

Inatsisartunut ilaasortat ataasiakkaat ullumi Inatsisartut sinnerlugit allanik suliassaqarnertik pissutigalugu pissutissaqavillutik najuutinngillat. Ilaasortat marluk pingasulluunniit taasisarneq pillugu isumaqatigiissuteqarsimapput, taamaattumillu taasisinnaanatik.

 

Ilaasortat sinneri ullumi taasinermi peqataasinnaagaluarput peqataasariaqaraluarlutillu – Inatsisartummi aalajangiisinnaassuseqarnissaannut naammalluaramik.

 

Taamatulli pisoqanngilaq: ilaasortat arfinillit-arfineq marluk tamarmik parteeqatigiit takkutinngitsoorput, naak oqartoqaraluartoq illup iluaniittut. Ilaasortat najuutinngitsut Inatsisartut ataatsimiittarfiannukaqqullugit ataatsimiinnermi aqutsisup arlaleriarluni qinnuigigaluarpai taasisoqarsinnaaqqullugu. kinguneqanngitsumilli.

 

Taamaalillutillu ilaasortat pineqartut ullumi inatsisissatut siunnersuutinik aalajangiiffigisassatullu siunnersuutinik suliarinninnissaq akornuserpaat.

 

Ilaasortat sulinerat qinikkatut pisortanillu toqqakkatut suliaqarnertut isigineqarpoq. Taamaalillutillu ilaasortat pissutissaqavillutik peqataasinnaanngissimanngikkunik peqataanissamut pisussaatitaapput.

Tamatuma nassatarinngilaa oqaluuserisassani immikkoortup suliarinerani tamarmi ilaasortat Inatsisartut ataatsimiittarfianiittariaqarnerat. Taasinissalli ingerlanneqarnissaa siunertaralugu ataatsimiinnermi aqutsisoq ilaasortat Inatsisartut ataatsimiittarfiannukarnissaannik kaammattuippat ilaasortat soorunami tamanna malissavaat. Taamaaliunngikkunik Inatsisartut sulinerannut akornusersuissapput.

 

Suliami qinersisartut uatsinnut isumagisassanngorlugu akisussaaffinngortitaanni aammalu ingerlatissallugu akissarsiffigisartakkatsinni peqataajumanatik ilaasortat ataasiakkaat partiimit ataatsimeersut pisussaaffimminnik ullumi sumiginnaanerat takullugu nikalluallannarpoq.

 

Annermik nikalluallannassaaq tamanna tassaasimappat ullormut taasinerit ingerlanneqarnissaannik piaaraluni akornuseeriarnerullunilu Inatsisartunik soriarsinnaajunnaarsitsiniarnerusimappat. Taamatut siusinnerusukkut pisoqarsimaneranik Siulittaasoqarfik eqqaamasaqanngilaq. Siulittaasoqarfillu neriuppoq taamatut misigisaqaqqittoqanngisaannassasoq.

 

Inatsisartut pinnguartarfiunngillat. Nunap inatsisiliortorai.

 

 

 

 

 

Inussiarnersumik inuulluaqqusillunga

 

Vivian Motzfeldt

Inatsisartut Siulittaasoqarfiat sinnerlugu