Kukkunersiuinermut Ataatsimiititaliaq Savalimmiuni naatsorsuutit pillugit isumasioqatigiinnermik ingerlatsivoq suliffeqarfinnullu pulaarluni

Inatsisartut Kukkunersiuinermut Ataatsimiititaliaat ulluni 6.-13. august Savalimmiunut angalavoq. Nunatta Karsiata naatsorsuutaanik misissuinissaq, Sanaartornermut Iluarsaassinermullu Aningaasaateqarfik kiisalu ataatsimiititaliamit apeqquteqaatit Naalakkersuisunit akissuteqarfigineqartut suliarinissai angalanermut siunertaapput. Tamatuma saniatigut ataatsimiititaliamit kissaatigineqarpoq Savalimmiuni inatsisartut kukkunersiuinermut misilittagaat, pisortat aningaasaqarnikkut aqutsineranni aammalu qitiusumik inuiaqatigiinni immikkoortortani misilittakkanik paasisaqarnerulernissaq.

Tórshavnimi borgmesteri Elsa Berg, Landsgrannskoðarin (Nunap kukkunersiuisua) aamma Lagtingemi kukkunersiuinermut ataatsimiititaliaq, Gjaldstovan (Aningaasaqarnermut Aqutsisoqarfik) kiisalu Fíggjarmálaráðið (Aningaasaqarnermut ministeria) aningaasaqarnermut ministeri Aksel V. Johanneseni peqatigalugu ataatsimiititaliap angalanermini naapippai. Ilaatigut SEV (nukissiuutitigut pilersuinermut ingerlatseqatigiiffik), Atlantic Airways (timmisartuussileqatigiiffik) aamma Bakkafrost (aalisarnermut ingerlatseqatigiiffinni anginerpaaq) ataatsimiititaliamit pulaarneqarput.

Savalimmiuni aaqqiissutit sulinermilu atorneqartartut kiisalu unammilligassat periarfissallu Kalaallit Nunaata Savalimmiullu amerlasuutigut assigiiffigisaat pillugit paasissutissat pingaarutillit Kukkunersiuinermut Ataatsimiititaliamit pissarsiarineqarput.

Ataatsimiititaliamut kissalaartumik tikilluaqqusinerannut, pitsaasumik oqaloqatigiinnernut aamma misilittakkaminnik avitseqateqarnerannut Kukkunersiuinermut Ataatsimiititaliaq tamanut qujavoq.

Nivi Rosing

Kukkunersiuinermut Ataatsimiititaliami Siulittaasoq

Paasissutissanik annertunerusunik perusukkaanni ataatsimiititaliami siulittaasoq uunga attavigineqarsinnaavoq mobil +299 486263