Ullormut oqaluuserisassat

Ullormut oqaluuserisassanut nassuiaat.

Kalaallit Nunaanni aalajangersimasumik najugaqartunut nunatta iluani silaannakkut angalanerup akikinnerulersinneqarnissaa pillugu aaqqissuussinissamik Naalakkersuisut suliaqarlutik kingusinnerpaamik UPA2027-mi Inatsisartunut saqqummiussinissaannik peqquneqassasut Inatsisartut aalajangiiffigisassaattut siunnersuut.
Aaqqissuussinissamut siunnersuummi ilaatigut najugaqarneq tunngavigalugu immikkut akigititat imaluunniit angalanermut tapiissutit, isorliunerusuni imaluunniit silaannakkut angallannikkut periarfissakinnerusuni najugaqartunut immikkut aaqqiissutit, ukiumut angalanerit tapiiffigineqarsinnaasut amerlassusissaat, aningaasalersuinissamut periarfissat kiisalu aaqqissuussinerup aningaasaqarnikkut, allaffissornikkut inuiaqatigiinnullu kingunerisassai nalilersorneqassapput.

Tasiilaq, Kulusuk, Nerlerit Inaat aamma Ittoqqortoormiit ukioq kaajallallugu aalajangersimasumik silaannakkut kiffartuunneqarnissaat, inoqarfiillu akornanni pisariaqartinneqartunik angallannikkut attaveqarnissaq kiisalu Islandimut silaannakkut attaveqarnerup ingerlaannarnissaa pitsanngorsarneqarnissaalu kiffartuussinissamut isumaqatigiissutit nutarterneqarnissaanni qulakkeeqqullugit, taamatullu isumaqatigiissutit atuuttut iluanni periarfissat atorneqarsinnaasut piaartumik atorlugit ilaasunik, allakkanik nassiussanillu angallassinerup pitsanngorsarneqarnissaa Naalakkersuisut peqquneqarnissaannik Inatsisartut aalajangiiffigisassaattut siunnersuut.

Nunatsinni illoqarfinni nunaqarfinnilu kigutit nakorsaqarfiunngitsuni innuttaasut kigutigissaarnikkut naligiinnerusumik sullissivigineqarnissaat anguniarlugu, atuuttumik aaqqissuussinerup nalilersorneqarnissaa aammalu pisariaqartunik nutaanik aaqqiissutissanik imaqartumik nuna tamakkerlugu periusissiamik Naalakkersuisut suliaqarlutik kingusinnerpaamik UKA2028-mi Inatsisartunut saqqummiussinissaannik peqquneqarnissaannik Inatsisartut aalajangiiffigisassaattut siunnersuut.

Saammaasseqatigiinnissamut Isumalioqatigiissitap innersuussutai, Namminersorneq pillugu Inatsit kiisalu nunasiaataasimanerup kinguneri pillugit ilisimatusarnerit tunngavigalugit, nunasiaataasimanerup kingunerinik qaangiiniarnissamut, inuiaqatigiittut nukittorsaanissamut aammalu Kalaallit Nunaata naalagaaffinngornissaanut piareersarnissamut anguniagaqarfiusumik, piffissalersugaasumik malitseqartitsiviusumillu ataatsimoortumik periusissiamik Naalakkersuisut suliaqarlutik kingusinnerpaamik UPA 2027-mi Inatsisartunut saqqummiussinissaannik peqquneqarnissaannik Inatsisartut aalajangiiffigisassaattut siunnersuut.

Isumaginninnermi piginnaasat atorluarneqarnerunerisigut naartusunut, ilaqutariinnullu peqqinnissaqarfimmi siusissumik tapersersuineq qanoq nukittorsarsinnaaneripput pillugu, apeqquteqaat aallaavigalugu oqallinnissamik siunnersuut

Apeqquteqaat aallaavigalugu oqallisissiassatut siunnersuut, qanoq ililluta qajamik qimussimillu ilitsoqqussaralugu piniariaatsit pigiinnarneqarsinnaallutillu nukittorsarneqarnissaannik attanneqarnissaanut sinaakkutigineqartut iluini.