Ullormut oqaluuserisassat

Ullormut oqaluuserisassanut nassuiaat.

Naalakkersuisut politikkikkut suliniutit pingaarutillit ingerlanneqartut, aningaasaqarnikkut suliniutit pingaarutillit inuiaqatigiinnilu suliassaqarfinni attuumassuteqartuni allannguutit pingaarutillit pillugit, nalunaaruteqartarnermi nakkutilliinermilu aaqqissuussinerit pioreersut aqqutigalugit naammattumik paasissutissiissutigineqareersimanngitsut, Inatsisartunut aalajangersimasumik aaqqissuussaasumillu paasissutissiisarnissaq pisussaaffinngortillugu malittarisassanik suliaqarnissamik peqquneqarnissaannik Inatsisartut aalajangiiffigisassaattut siunnersuut. Malittarisassani suut pillugit paasissutissiisoqartassanersoq, paasissutissiissutit qanoq ilusilersorneqassanersut qanorlu akulikitsigisumik saqqummiunneqartassanersut aalajangersarneqassapput, aammalu suliassat pisariaqanngitsumik marloriaatinngorlugit ingerlanneqannginnissaat qulakkeerneqassalluni. Naalakkersuisut malittarisassanut siunnersuut kingusinnerpaamik UPA 2028-mi Inatsisartunut saqqummiutissavaat.

Naalakkersuisut Sullualummut (Nordvestpassagen) atatillugu Avannaani Avannaata-Kitaanilu imartatsinni umiarsuit angallannerisa annertusiartorsinnaanerata piniarfinnut, immami miluumasunut najukkamilu inuussutissarsiornikkut soqutigisanut kingunerluutigisinnaasai pinaveersaartinniarlugit kingusinnerpaamik UPA 2027-mi iliuusissanut pilersaarummik suliaqarnissamik peqquneqarnissaannik Inatsisartut aalajangiiffigisassaattut siunnersuut. Pilersaarummi Kalaallit Nunaata nammineq oqartussaaffiisa iluanni suliniutissat kiisalu naalagaaffimmi oqartussaasunik nunanilu tamalaani suleqatigisassanik attuumassutilinnik suleqatigiinnissamut periarfissat ilaatinneqassapput.

Pisortat inissiaataanni attartortut ilinniagaqarnersiuteqarfiusumik ilinniagaqalernerminni ilinniarnerup nalaani inissiaminniiginnarsinnaanissaat, ineqarnermullu nammineq akiliutaat inoqutigiit amerlassusaat tunngavigalugit ilinniartut inaanni ineqarnermut akiliummut atuuttumut aallaaviatigut naapertuuttunngortinneqarnissaa qulakkeerniarlugu Naalakkersuisut kingusinnerpaamik UKA 2027-mi pisariaqartinneqartunik inatsisini malittarisassanilu allannguutissatut siunnersuuteqarnissaannik peqquneqarnissaat pillugu Inatsisartut aalajangiiffigisassaattut siunnersuut. Aaqqissuussineq ilinniagaqartup ukiuinik killilersorneqassanngilaq.

Sulinerup saniatigut isertitat akileraarutitigut oqilisaaffigineqarnissaat pillugu Naalakkersuisut peqquneqarnissaannik Inatsisartut aalajangiiffigisassaattut siunnersuut.
Naalakkersuisut kingusinnerpaamik UPA2027-imi akileraaruserinermut inatsisip allanngortinneqarnissaanut siunnersuummik saqqummiusseqqullugit peqquneqassapput, taamaalilluni innuttaasut nalinginnaasumik imaluunniit ileqquusumik suliffimmik saniatigut nammineq piumassutsiminnik immikkut suliaqarnermikkut isertitaat nalinginnaasumik inuttut isertitanut sanilliullugit akileraarutitigut oqilisaaffigineqarsinnaaqqullugit.
Aaqqissuussinermut ilaatigut piffissaq nalinginnaasumik suliffiusartoq sinnerlugu sulineq, immikkut vagteqarnerit kiisalu sulisitsisumi allami saniatigut sulineq ilaatinneqassapput. Aaqqissuussineq innuttaasut amerlanerusumik suleqqajaalernissaannik, sulisoqarnikkut periarfissat annertusarnissaannik aammalu Kalaallit Nunaanni sulisussanik pisariaqartitsineq nunami maani sulisinnaasut pioreersut annertunerusumik atorlugit matussuserneqarnissaanik siunertaqassaaq.