Inatsisartut Siulittaasuata Kim Kielsenip ulloq 22. juni 2026-mi Nuummi Naalakkersuisut Siulittaasuat Jens-Frederik Nielsen kuultiusumik Nersornaaserpaa

Inatsisartut Siulittaasuata Kim Kielsenip Nuummi Hans Egedep Illuani nalliuttorsiorpalaartumik katerisimaarnermi Naalakkersuisut Siulittaasuat Jens-Frederik Nielsen kuultiusumik Nersornaaserpaa.

Naalakkersuisut Siulittaasuat Jens-Frederik Nielsen  tunniusimalluni naalakkersuinikkut suliniarsimanera piffissallu sivikitsuinnaap ingerlanerani Naalakkersuisut Siulittaasuattut piffissami ilungersunartumi ataqqinartumik suliaqarsimanerminut kuultiusumik Nersornaaserneqarpoq.

Inatsisartut Siulittaasuata Jens-Frederik Nielsenimut oqalugiarnermini ilaatigut makku erseqqissaatigai:

“Sulinerit allaffissornerup iluani aallartippat 2020-milu Inuussutissarsiornermut Aatsitassanullu Naalakkersuisunngornerpit tungaanut aammalu Demokraatinut siulittaasutut qinigaanerpit tungaanut ingerlassimallugu.  Ukioq 2025-mi Naalakkersuisunut Siulittaasunngorputit.

Inuiaqatigiinni kalaallini inuttut nuimasutut pingaarutilittullu inissisimavutit aammalu Naalakkersuisunut ilaasortatut naalakkersuinikkut ingerlatanik pingaarutilinnik arlalippassuarnik ataatsimoornitsinnut toqqaannartumik sunniuteqarsimasunik ilusilersueqataasimallutit. Minnerunngitsumik Kalaallit Nunaata nunarsuarmi sumi inissisimanini pissutigalugu nunanullu allanut tunngatillugu naalakkersuinikkut ilungersunartumik inissisimanerani ataatsimoortitsisinnaanermik piginnaasaqarnerit takutissimavat. Naalakkersuinermik ingerlatani ajornakusoortuni aqutsisinnaassuseqarnerit tamatsinnut kajumissuseqalersitsisimavoq. Kalaallit Nunaat sinnerlugu malunnaatilimmik oqaaseqartartuuginnanngilatit aammali attaveqaatinik pilersitsisimavutit nunat ingerlataqartullu assigiinngitsut akornanni suleqatigiinnermik pilersitsiviusumik. Inuit assigiinngitsunik tunuliaqutillit ataatsimoortilersinnaasimavatit, taamaalillutillu sumiikkaluaraangavilluunniit peqataatitsinerulersimallutillu oqaloqatigiinnerunissamik ujartuinermik pilersitsisimallutit.

Piffissami unammillernarfiusumi aqutsinerit neriuuteqarnermik pilersitsisarsimavoq. Erseqqissumik unneqqarissumillu attaveqarsinnaassutsit tutsuiginninnermik pilersitsivoq aalajangersinnaassutsillu tamatsinnut siunissamik pitsaanerusumik anguniagaqalersitsivoq.”

Siulittaasoqarfik sinnerlugu

Inatsisartut Siulittaasuat Kim Kielsen