Sunniuteqarnerunissaq naligiinnerusumillu suleqatigiinnissaq Nunat Avannarliit Siunnersuisoqatigiiffiata 78-issaanik ataatsimiinnerani Kalaallit Nunaata qitiutillugit sammivai

Kalaallit Nunaata Nunat Avannarliit Siunnersuisoqatigiiffiannut aallartitai, tassaasut aallartitat siulittaasuat Justus Hansen ilaasortarlu Mimi Karlsen, ulluni makkunani Nunat Avannarliit Siunnersuisoqatigiiffiata 78-issaanik ataatsimiinnerani Finlandip Riksdagiani Helsinkimi ulluni 26. oktoberimit 29. oktoberimut 2026 ingerlanneqartumi peqataapput.

Ukioq manna ataatsimiinnermi qulequtarineqarpoq “Nunani avannarlerni sillimaniarneq ataatsimut isigalugu”. Tassunga atatillugu kalaallit aallartitaasa Helsingforsimi isumaqatigiissutip aaqqissuuteqqinneqarnissaa nutarterneqarnissaalu immikkut aalluppaat. Suliat maanna ingerlanneqartut Kalaallit Nunaata nunat avannarliit suleqatigiinneranni inissisimanerata nukittorsarneqarneranik aammalu naligiimmik suleqatigiittoqarnissaanik kiisaatip ukiuni aggersuni piviusunngortinneqarneranik nassataqarnissaat Kalaallit Nunaata assut kissaatigaa.

Ilaasortat nunani avannarlerni suleqatigiinnermut pitsaasumut qujapput, tamatuma maanna inerneralugu nunat namminersorfiusut Kalaallit Nunaat, Savalimmiut Ålandilu Nunat Avannarliit Siunnersuisoqatigiiffiata siulittaasoqarfiani, siunnersuisoqatigiit naalakkersuinikkut qulliunerusumik aqutsisoqarfigisaanni, aalajangersimasumik naligiimmillu inissaqalernerat. Tamanna soorlu silap pissusianik, avatangiisinik kiisalu meeqqat inuusuttuaqqallu atugarissaarnerannik suliassaqarfiit pingaarutillit iluini soqutigisat isumaginissaannut inissaqalersitsillunilu periarfissaqarnerulersitsivoq. Tamatuma saniatigut Justus Hansen Nunat Avannarliit Siunnersuisoqatigiiffianni 2027-mi ukiup affaani siullermi siulittaasup tulliatut toqqarneqarpoq, aammalu Kalaallit Nunaat siulittaasup tulliatut atuuffeqareerpat siulittaasup tulliatut atuuffik Savalimmiunit tiguneqassalluni.

Kalaallit Nunaata Nunat Avannarliit Siunnersuisoqatigiiffianni annertunerusumik sunniuteqarnissaa qulakkeerniarlugu suliap ingerlateqqinneqarnissaata nunat naalakkersuisuisa suleqatigiiffianni Nordisk Ministerrådimi tamakkiisumik aamma tusaaniarneqarnissaa Kalaallit aallartitaannit isumalluarfigineqarluarpoq.