Qineqqusaarutinik naammassinninnginnerit kisitsillu 16

 

Naalakkersuinermik sulialinnik qatsussineq qinersereernerup kingorna takornartaaneq ajorpoq. Danmarkimi pissutsit ullutsinni taamaapput, tamannalu aamma uagutsinni tusartarparput: ”Sooruna partiit qinikkallu pissaanermik tigusisut qineqqusaarutitik qimarratigiuaraat?”

 

Apeqqummut tassunga akissut – imaluunniit akissutip ilaa – tassaavoq kisitsit 16-i! – tassa Inatsisartuni amerlanerussuteqarniaraanni ilaasortat pisariaqartinneqartut.

 

Namminersornerulernerup eqqunneqarnerata kingorna partii ataaseq ataasiaannarluni Inatsisartuni amerlanerussuteqarsimavoq. Taamaattumik naalakkersuisunngortitsiniarluni partiit arlallit suleqatigiittariaqartarput.

 

Tamatumani piumasaqaataavoq partiit tamarmik immikkut pingaartitamik ilaannik (qallunaat oqartarnerattut ”qatigattuunik”) ”iisisariaqartarnerat”. Partiit naalakkersuisuutitaqalersut arlaannaataluunniit kissaatini tamaviisa naammassisinnaanngilai – isummat naapeqatigiissinneqartariaqarput naapeqatigiittariaqarlutillu. Tamanna aamma atuuppoq pingaartitanut, sulissutiginiarlugit qinersisartunut neriorsuutigineqarsimasunut.

 

Qaqugukkulluunniit illuatungiliuttut (naalakkersuisuutitaqartunut ilaanngitsut) tamatuma kingorna partiit naalakkersuisuutitaqartut assigiinngitsut neriorsuutiminnik qimarratiginninnerarlugit tutsuiginannginnerarlugillu pisuutittarsinnaavaat. Tamanna sunniuteqarluarsinnaavoq – immaqa minnerunngitsumik qinigaaffiup nutaap aallartinnerani, qinersinermilu neriorsuutit suli qinersisartunit eqqaamaneqarnerini, Naalakkersuisullu inatsisinik allannguinerit innuttaasunut neriorsuutigisimasamik arlaannaataluunniit naammassineqarnissaata piareersarneqarnissaanut pisariaqartumik suli naammattumik piffissaqarsimatinnagit.

 

Partiinut naalakkersuisuutitaqalersunut illuatungiliuttut neriorsuutinik eqquutsitsinnginneraaneri naleqqutinngitsutut paasiuminartutulli isikkoqarsinnaapput. Pissaanermilli tigusaqarnertik – killiliussat tamatuma malitsigisai tamaasa ilanngullugit - partiit taakkua tuppallersaatigiinnartariaqarpaat ...

 

Naaperiaanerit pisariaqartut kisiisa eqqarsaatiginagit, kisiannili aamma nunap aningaasaqarniarnerata killiliineri, taakkualu qaavisigut suut Naalakkersuisut iluamik susinnaanngisaat: nunat tamalaat akornanni siooranartorsiortitsinerit, ajornartoornerit sorsunnerillu, nunarsuarmi akigitinneqartut qaffariartupiloorneri, suullu allat misigisarliuutit nunatsinnut takkussinnaasut eqqarsaatigalugit.

 

Puigorniaqinatigulu: nunatsinnut innuttaasunullu akisussaanerup akisussaassuseqartumik aqunneqarnissaa, taamalu aamma ilaatigut nuannarineqanngitsunik pisariaqartunilli aalajangiisarnissaq, pisariaqarmat. Iliuutsit kinguneqartarmata sunut tamanut akissaqannginnatta … taamatullu aamma iliuuseqannginnerit kinguneqartarmata.

 

Soorunamilu tassaniippoq akissutip immikkoortuata aappaa, tassalu partiit naalakkersuinermillu suliallit pissaanermik (kisiannili aamma akisussaaffimmik) tigusisimasut qineqqusaarnermi neriorsuutiminnik sooq timitaliisinnaannginnerannut.

 

Naggataatigut apeqqutaalersarpoq tunngaviatigut kina tutsuiginarnerpaanersoq: Umiarsuup naalagaa aqqutissani iluliaqaraluartoq aqqutissaminik aalajangiusimannittoq – imaluunniit umiarsuup naalagaa umiarsuarmi ilulissanut apornissaa pinngitsoortinniarlugu aqqutissaminik iluarsiisinnaasoq …?

 

 

 

 

Ikinngutinnersumik inuulluaqqusillunga

 

Kim Kielsen

Inatsisartut Siulittaasuat